So ä Frechheit. 

Es is jo net so, dass mir net minanner redde deeten. Nää - im Gechedääl! Manchmol lobt der mich sogar unn´s gibt ach ä Sternl, wann ich alles gut gemacht hab. Nooch meim Hinnerwandinfarkt unn nooch dere Installazion vun denne drei Stents hot mer de Dokter viel Beweechung verordent. "Laafe unn Radfahre" hab ich mer verschriwwe. Des dut ach inzwische meim Blutdruck gut unn ich fühl mich puddlwohl dodebei.

Zu meim 68. Geburtsdaach hänn mir dann mei Kinner ä 'Gerätl gschenkt, des mer wie ä Armbanduhr am Handgelenk traache dut. Des messt de Puls unn macht noch so annere Uffzeichnunge. Wie des Ding werklich hääßt, wääß de Deiwl. In de Bedienungsan´leitung steht allerdings "Fitbit-Gerät".

Weil mir uns jo daachsiwwer ziemlich nooh sinn, sinn mer inzwische ach perdu unn ich saach immer Jonas zu meim A´hängsl. In dere Gebrauchsa´leitung steht, dass es em nix beim Händewesche schaade deet, denn do wer der jo nass.

Awwer heit, do hot der mich mol so uffgereecht, dass mein Blutdruck sprungartisch nooch owwe gschnerrt ist. Glei nooch em Frühstück - so um halwer Neune - bin ich in de Werkstatt rumgerennt, hab´s Werkzeich gericht, ´s Material beigschlääft unn bin laufend hie- unn hergedabbt.

Uff ämol, so um halwer Zehne rum vibriert der Jonas am Handgelenk unn gibt mer in Laafschrift zu verstehe: "es ist Zeit für ein paar Schritte!" "Du Knallkopp" hab ich zu dem Scheißding gsaacht, "du Knalkopp - ich renn mer do ball de Herzbännl ab unn du muscht mer saache, dass ich mich beweeche soll. Uff ääns kannscht awwer ääner losse, mein Freund: wann des noch ämol machscht, dann saach ich nimmie Jonas zu der, dann saach ich norre noch des Wort, wu mit emme große "K" a´fangt unn emme klääne "p" uffheere dut. Do kannscht awwer Gift druff nemme, du K........!