Die Schbichlbrezl

Wann ich als mit em Auto unnerwegs war, is alsmol de klääne Hunger uffkumme. Dann bin ich halt in die nächschd beschd Bäckerei un hab geguckt, ob ich als alter Speyerer Brezelbu irchendwu noch ä Brezl zu kaafe krich.

Die G´schäftswelt schafft nadierlich mit allermechliche Tricks, ihr Ware a´zupreise un än guter Eidruck zu mache. Dozu g´heeren bassende Platzierunge der Ware, Sondera´gebote un nadierlich ach Schbichl.

Wie ich jetzt in der Bäckerei steh, seh ich hinne uf dem Regal zwää Brezle liche.

Dann hab ich zu dere nette Verkaiferin g´saacht: "Ich hätt gern die zwää Brezle".

"Des is awwer blooß äni" hot se mer geantwort.

Weil die Brezl vorm Schbichl geleche ist, hot des wie zwää Brezle ausg´sehe.

"Ei dann nemm ich halt die änd Brezl, was koscht dan die?"

"Die koscht 55 Cent" hot se zu mir g´saacht".

"Jetzt bassen Se mol uff:
Ich geb Ihne jetzt 30 Cent, die lechen se vor de Schbichl, un not gewen se mer noch 5 Cent raus", hab ich ´re vorg´schlache.

Awwer do druf hot se sich dann doch net ei´gelosst.