Was nitzt´s ?

Was suchscht du blooß am Hindukusch?
Odder vielleicht sogar im Busch?
Was machscht du dor mit em Gewehr?
Un deinre Fraa fehlscht du so sehr!

Dei Dechterle, die ganz klää Grott,
die furchtbar Sehnsucht noch dir hot,
un ach dein Sohn, der klääne Schelm,
winscht sich än Babba uhne Helm!
Dei Fraa, die sieht dich als im Drääm,
du kämscht zu ihr als Krippl häm!

Was nitzt der Sold, des viele Geld,
bringt mer dich hääm - als dooter Held?









.